Nvidia planifikon të shesë teknologjinë për të përshpejtuar komunikimin me çip AI
Në konferencën Computex në Taipei, CEO i Nvidia-s, Jensen Huang, prezantoi NVLink Fusion – një teknologji të re që lidh çipat e inteligjencës artificiale dhe përmirëson ndjeshëm shpejtësinë e komunikimit mes tyre. Kjo teknologji do t’u ofrohet edhe kompanive të tjera që prodhojnë çipa, si MediaTek dhe Marvell, për të ndërtuar sisteme të fuqishme AI.
NVLink Fusion është versioni më i ri i teknologjisë NVLink, që Nvidia e ka përdorur për të ndërlidhur procesorët e saj më të avancuar. Huang njoftoi gjithashtu se kompania do të hapë një zyrë të re qendrore në periferi të Taipei-t dhe konfirmoi se kompjuteri desktop për studiues të AI, i quajtur DGX Spark, është në prodhim dhe do të dalë në treg brenda pak javësh.
Nvidia, e njohur më parë për çipat grafikë për videolojëra, është kthyer në liderin global të teknologjisë AI, veçanërisht pas rritjes së kërkesës për AI që pas lançimit të ChatGPT në vitin 2022. Kompania po zhvillon gjithashtu breza të rinj çipash AI, si Blackwell Ultra, Rubin dhe Feynman, që pritet të dalin deri në vitin 2028.
Linku: https://www.reuters.com/world/asia-pacific/nvidias-huang-set-showcase-latest-ai-tech-taiwans-computex-2025-05-18/
Burimi i fotos:pexele.com