Këngëtari legjendar Billy Joel është diagnostikuar me një çrregullim të rrallë të trurit, dhe gruaja e tij, Alexis Roderick Joel, ka thyer heshtjen për herë të parë pas lajmit shqetësues. Ajo shprehu mirënjohjen për dashurinë dhe mbështetjen e marrë nga publiku.
“Faleminderit për gjithë dashurinë dhe përkrahjen,” shkroi Alexis, 43 vjeç, përmes llogarisë zyrtare të Billy Joel në Instagram më 26 maj. “Jemi jashtëzakonisht mirënjohës për kujdesin e mrekullueshëm dhe diagnozën e shpejtë që morëm. Për ne, Billy është një baba dhe bashkëshort që ndodhet në qendër të botës sonë.”
Joel, 76 vjeç, u detyrua të anulojë të gjitha koncertet e planifikuara pasi u diagnostikua me hidrocefalus me presion normal (Normal Pressure Hydrocephalus – NPH), një çrregullim i trurit që shkakton akumulimin e lëngut cerebrospinal në trurin e pacientit, duke ndikuar në memorien, ekuilibrin dhe kontrollin e fshikëzës.
Ekipi i Joel-it sqaroi se ai ka pasur vështirësi me dëgjimin, shikimin dhe balancën gjatë performancave të fundit. Mjekët i kanë rekomanduar ndalimin e menjëhershëm të performancave dhe fillimin e një terapie fizike të specializuar. Performanca e fundit e tij u mbajt në Mohegan Sun Arena, Connecticut, në shkurt.
Pavarësisht sfidës shëndetësore, Alexis shprehu shpresën për përmirësim: “Jemi të mbushur me shpresë për rikuperimin e tij. Mezi presim t’ju shohim të gjithëve përsëri në të ardhmen.”
Edhe vajza e tij, Alexa Ray Joel, dhe ish-bashkëshortja Christie Brinkley kanë reaguar publikisht, duke i dërguar Joel-it fjalë dashurie dhe urime për shërim të shpejtë. Brinkley, 71 vjeç, shkroi në Instagram: “Të gjithë ne, familja Brinkley, po të dërgojmë shumë dashuri dhe urime për rikuperim të plotë.”
Ajo shtoi: “Ti i sjell gëzim miliona njerëzve. Merru me kujdes me veten – të duam prapë në skenë, sepse je dhe do të jesh gjithmonë Piano Man-i ynë.
Linku: https://www.yahoo.com/news/billy-joel-wife-alexis-publicly-120556958.html
Burimi i fotos: https://www.instagram.com/billyjoel/