AirPods Pro 3 mund të jenë pranë lançimit – zbulohen në kodin e iOS 26
Edhe pse Apple nuk prezantoi ndonjë pajisje të re gjatë konferencës WWDC 2025 këtë të hënë, duket se surprizat nuk kanë përfunduar. Sipas raportimeve nga Steve Moser i MacRumors, në versionin beta të iOS 26 për zhvilluesit janë zbuluar referenca të qarta për një model të ri kufjesh: AirPods Pro 3.
Në kodin e sistemit operativ përmenden në mënyrë të veçantë “AirPods Pro”, “AirPods Pro 2” dhe për herë të parë “AirPods Pro 3”, duke ngritur dyshimet se Apple është në fazat e fundit të përgatitjes për lançimin e gjeneratës së re të kufjeve inteligjente.
Për më tepër, janë gjetur edhe fraza të tilla si “AirPods Pro 2 ose më vonë”, që sugjerojnë se Apple po përgatit përditësime të rëndësishme në linjën e AirPods, duke përfshirë ndoshta edhe veçori të reja që kërkojnë harduer të përmirësuar.
AirPods Pro 2 u lançuan pothuajse tre vite më parë, ndaj një rifreskim do të ishte mëse i pritshëm në ciklin e zakonshëm të produkteve të Apple. Edhe pse nuk ka ende një konfirmim zyrtar apo një datë lançimi, këto zbulime në kodin e iOS 26 janë një tregues i qartë se AirPods Pro 3 mund të jenë më afër sesa mendohej.
Linku:https://techcrunch.com/2025/06/11/airpods-pro-3-could-be-on-the-way/
Burimi i fotos:pexele.com