Australia heq ndalimin për dhurimin e gjakut dhe plazmës për homoseksualët

Australia do të heqë rregullat që ndalojnë burrat homoseksualë dhe biseksualë, si dhe gratë transgjinore që kanë pasur marrëdhënie seksuale me burra në tre muajt e fundit, të dhurojnë gjak ose plazmë. Ky ndryshim, që hyn në fuqi më 14 korrik 2025, cilësohet si një hap udhëheqës në nivel botëror në përditësimin e rregullave të epokës së HIV-it.

Shërbimi kombëtar Lifeblood njoftoi se dhurimi i plazmës do të lejohet për shumicën e personave HIV-negativë, edhe nëse ata marrin medikamente parandaluese (PrEP), pa nevojën për periudhë pritjeje. Pritet që ndryshimi të sjellë 24,000 dhurues të rinj dhe 95,000 dhurime shtesë në vit.

Drejtori mjekësor i Lifeblood, Dr. Jo Pink, tha për ABC News se rregullat aktuale datojnë nga periudha e HIV-it dhe kanë qenë të nevojshme në atë kohë, por tani janë bërë të panevojshme dhe stigmatizuese për komunitetin LGBTQIA+.

Po ashtu, rregullat e reja do të jenë neutrale, ku të gjithë dhuruesit do të pyeten për aktivitetin seksual në të njëjtën mënyrë, pa u bazuar në gjini apo orientim seksual. Burrat nuk do të pyeten më nëse kanë pasur marrëdhënie seksuale me burra të tjerë. Ata që janë në një lidhje të qëndrueshme mbi 6 muaj do të jenë të pranueshëm për të dhuruar, ndërsa ata me partnerë të rinj ose të shumtë gjithashtu mund të dhurojnë nëse nuk kanë pasur marrëdhënie anale në 3 muajt e fundit.
Ndryshimet në pyetësorët për dhurimin e gjakut pritet të zbatohen në vitin 2026.
Linku: https://www.theguardian.com/australia-news/2025/jun/18/gay-bisexual-blood-plasma-donation-ban-scrapped-ntwnfb

Burimi i fotos:pexele.com