Mira Murati mbyll një investim prej 2 miliardë dollarësh për startup-in e saj

Ish-shefja e teknologjisë së OpenAI, Mira Murati, ka siguruar një investim rekord prej 2 miliardë dollarësh për startup-in e saj të ri të inteligjencës artificiale, Thinking Machines Lab, sipas një raportimi të Financial Times. Investimi e vlerëson kompaninë 6-muajshe në plot 10 miliardë dollarë – një nga raundet më të mëdha të financimit fillestar në historinë e teknologjisë.

Ende nuk është bërë publik se çfarë po zhvillon saktësisht kompania, por profili i lartë i Muratit dhe bashkëpunëtorëve të saj ka tërhequr interes të madh nga investitorët. Raundi është kryesuar nga Andreessen Horowitz, me pjesëmarrjen edhe të Conviction Partners të Sarah Guo.

Murati u largua nga OpenAI në shtator të vitit të kaluar, pasi kishte drejtuar zhvillimin e disa prej produkteve më të njohura të kompanisë si ChatGPT, DALL·E dhe funksioni zanor i platformës. Ajo ishte një nga emrat më të rëndësishëm në kompani, dhe pas largimit të saj, disa prej ish-kolegëve, përfshirë bashkëthemeluesin e OpenAI, John Schulman, janë bashkuar me të në startup-in e ri.

Murati ishte gjithashtu ndër drejtuesit që ngritën shqetësime për mënyrën e drejtimit të CEO-së Sam Altman në vitin 2023. Pas një përplasjeje të madhe në bord që çoi në largimin e përkohshëm të Altman në nëntor të atij viti, Murati shërbeu si drejtuese e përkohshme e OpenAI – para se Altman të rikthehej shpejt në krye të kompanisë.

Investimi i ri tregon se investitorët janë të gatshëm të vendosin besim të madh financiar në projektet që dalin nga figura të spikatura të industrisë së AI-së, edhe kur detajet konkrete rreth produktit mbeten të paqarta.

Linku: https://techcrunch.com/2025/06/20/mira-muratis-thinking-machines-lab-closes-on-2b-at-10b-valuation/

Burimi i fotos: https://www.instagram.com/_iraurati/