Përdorimi në rritje i teknologjisë po sjell pasoja të dukshme në shëndetin e syve, sidomos tek të rinjtë. Studimet më të fundit tregojnë një lidhje të fortë mes kohës së gjatë të kaluar përpara ekranit dhe shtimit të rasteve të miopisë – një problem i përhapur që kufizon aftësinë për të parë qartë në largësi.
Ekspertët thonë se fëmijët dhe të rinjtë që kalojnë shumë orë duke parë nga afër – si për shembull në telefon, tablet apo kompjuter – janë më të prirë të zhvillojnë miopi. Kjo ndodh sepse sytë, të cilët janë ende në zhvillim, përshtaten me fokusimin nga afër dhe humbasin aftësinë për të fokusuar në distancë.
Sipas Organizatës Botërore të Shëndetësisë, deri në vitin 2050, mbi gjysma e popullsisë globale pritet të jetë miopike, dhe një nga shkaqet kryesore është pikërisht mënyra moderne e jetesës – me më pak kohë të kaluar jashtë dhe më shumë kohë para ekranit.
Mjekët rekomandojnë disa masa për parandalim, përfshirë:
• Shmangien e përdorimit të tepërt të pajisjeve elektronike, veçanërisht tek fëmijët nën 6 vjeç
• Zbatimin e rregullit 20-20-20: çdo 20 minuta, shikoni diçka që ndodhet 20 metra larg për të paktën 20 sekonda
• Kalimin e më shumë kohe në ambiente të jashtme, pasi drita natyrale ndihmon në zhvillimin e shëndetshëm të syve
• Kontrollet e rregullta te okulisti
Në një botë gjithnjë e më të dixhitalizuar, është e rëndësishme të balancojmë përfitimet e teknologjisë me ruajtjen e shëndetit tonë vizual – për të mbrojtur jo vetëm syrin, por edhe cilësinë e jetës në të ardhmen.
Linku: https://www.yourtango.com/experts
Burimi i fotos: pexele.com