Këngëtari i njohur Zayn Malik ka sqaruar statusin e tij sentimental, duke konfirmuar se aktualisht është beqar dhe nuk është në një lidhje. Gjatë një interviste në podcast-in “Call Her Daddy”, artisti 33-vjeçar u shpreh se nuk po frekuenton askënd në mënyrë romantike, edhe pse ka njerëz pranë tij në jetën e përditshme.
“Kam disa miq, por jo, nuk jam duke u takuar me askënd,” tha Malik.
Ai theksoi se kjo është periudha më e gjatë që ka kaluar si beqar, pas një dekade marrëdhëniesh publike që nga mosha 17 deri në 27 vjeç. Zayn ka qenë më parë i fejuar me këngëtaren Perrie Edwards (2012–2015), ndërsa më pas pati një lidhje të gjatë me modelen Gigi Hadid, me të cilën ka edhe një vajzë, Khai, e lindur në vitin 2020.
Këngëtari u shpreh se nuk e sheh vetminë si diçka negative, përkundrazi e konsideron një periudhë çliruese.
“Nuk më tremb të jem vetëm. Ndihem mirë me veten, më pëlqen të jem në shoqërinë time dhe të bëj gjërat sipas ritmit tim,” tha ai.
Zayn shtoi se kjo fazë i ka dhënë më shumë liri dhe më pak presion në jetën personale.
“Ishte çliruese. Mund të bëj plane si të dua, të fle kur të dua dhe të jetoj pa presion,” u shpreh ai.
Gjatë intervistës, ai foli edhe për një episod të mëparshëm me aplikacionin Tinder, duke treguar se eksperienca nuk kishte funksionuar për të.
“Askush nuk më besonte kur më shihte në aplikacion,” tha ai, duke shtuar se aplikacionet e takimeve nuk janë për të.
Deklaratat e tij kanë marrë vëmendje të madhe në media dhe rrjete sociale, duke rikthyer interesin e fansave për jetën personale të këngëtarit.
Burimi: https://www.youtube.com/watch?v=7CbSOkINeB4
Foto; https://www.instagram.com/zayn/?hl=en