Një studim i ri, i realizuar mbi më shumë se 40 mijë të rritur në Shtetet e Bashkuara dhe i ndjekur për rreth një dekadë, sugjeron se jo vetëm sasia e kafes ka rëndësi për shëndetin, por edhe ora kur ajo konsumohet mund të ndikojë në jetëgjatësi.
Rezultatet konfirmojnë se konsumimi i moderuar i kafes lidhet me përfitime të njohura shëndetësore, si ulja e rrezikut për sëmundje të zemrës, goditje në tru dhe diabet tip 2. Megjithatë, ky studim shkon një hap më tej duke analizuar ndikimin e kohës së konsumimit gjatë ditës.
Sipas të dhënave, personat që pinë kafe kryesisht në mëngjes përfitojnë më shumë. Ata rezultojnë me 16% më pak rrezik vdekjeje nga çdo shkak dhe 31% më pak rrezik vdekjeje nga sëmundjet kardiovaskulare, krahasuar me ata që nuk konsumojnë fare kafe. Në të kundërt, ata që e shpërndajnë konsumimin e kafes gjatë gjithë ditës nuk tregojnë të njëjtat përfitime të dukshme.
Ekspertët e lidhin këtë fenomen me ritmin biologjik të organizmit. Konsumi i kafes në orët e vona mund të ndikojë në prodhimin e melatoninës – hormoni që rregullon gjumin – duke ndikuar negativisht në cilësinë e tij dhe në shëndetin e përgjithshëm. Ndërkohë, në mëngjes, kur nivelet e inflamacionit janë më të larta, efektet anti-inflamatore të kafes mund të jenë më efektive.
Në përfundim, studiuesit theksojnë se për një stil jetese më të shëndetshëm nuk mjafton vetëm kufizimi i sasisë së kafes, por edhe zgjedhja e momentit të duhur për ta konsumuar atë.