Një artikull i publikuar në median ndërkombëtare Forbes ngre një perspektivë interesante mbi lidhjen mes inteligjencës dhe vetmisë, duke sugjeruar se njerëzit me inteligjencë të lartë shpesh përjetojnë më shumë izolim për shkak të mënyrës së ndryshme si mendojnë dhe ndërveprojnë me botën përreth. Sipas një studimi të publikuar në British Journal of Psychology, i cili analizoi mbi 15 mijë të rinj, ndërsa shumica e njerëzve ndihen më të lumtur kur socializohen shpesh, individët me inteligjencë të lartë raportojnë më pak kënaqësi nga jeta kur kanë më shumë ndërveprime sociale.
Studiuesit e lidhin këtë fenomen me të ashtuquajturën “teoria e savannës”, sipas së cilës njerëzit janë të programuar për të jetuar në grupe të vogla dhe për të përfituar emocionalisht nga kontaktet e shpeshta, por personat inteligjentë janë më të aftë të përshtaten me jetën moderne dhe nuk varen aq shumë nga këto ndërveprime për të qenë të lumtur.
Për ta, aktivitetet individuale si mendimi i thellë, puna krijuese apo projektet afatgjata janë më tërheqëse sesa ritualet sociale të përditshme. Një tjetër arsye lidhet me vështirësinë për të gjetur njerëz me të njëjtin nivel të të menduarit, pasi inteligjenca e lartë shpesh shoqërohet me mendim abstrakt dhe analizë të thellë, gjë që e bën komunikimin më sfidues në ambiente sociale të zakonshme.
Kjo mund të krijojë ndjesinë se nuk kuptohen nga të tjerët, duke çuar në një formë izolimi emocional edhe kur janë të rrethuar nga njerëz. Ekspertët theksojnë se kjo nuk do të thotë se njerëzit inteligjentë nuk kanë nevojë për lidhje sociale, por se ata priren të kërkojnë marrëdhënie më të thella dhe kuptimplota. Artikullin e plotë mund ta lexoni këtu:
Foto; Freepik.com