Tyra Banks ka ngritur një padi për shpifje ndaj Netflix, duke pretenduar se dokumentari “Reality Check: Inside America’s Next Top Model” e paraqet atë në mënyrë të rreme dhe dëmtuese për reputacionin e saj.
Modelja, prezantuesja dhe producentja e njohur paraqiti padinë më 13 qershor, duke argumentuar se dokumentari ka manipuluar materialet filmike për të krijuar një narrativë të pasaktë rreth rolit të saj në emisionin e famshëm “America’s Next Top Model”.
Sipas dokumenteve të paraqitura në gjykatë, Banks pretendon se përmes montazhit dhe lënies jashtë të pjesëve të rëndësishme të intervistës, është ndërtuar një “rrëfim i rremë” që sugjeron se ajo ka lejuar me vetëdije një rast të dyshuar sulmi seksual ndaj një konkurrenteje, ka shfrytëzuar traumën e saj për audiencë dhe më pas ka pretenduar se nuk e mbante mend ngjarjen.
Tyra Banks i ka mohuar kategorikisht këto akuza, duke i cilësuar ato si “plotësisht të sajuara” dhe të dëmshme për figurën e saj publike.
Dokumentari trajton polemikat që kanë shoqëruar 24 sezonet e spektaklit “America’s Next Top Model”, përfshirë pretendimet e një ish-konkurrenteje për sulm seksual gjatë xhirimeve dhe kritikat për mënyrën se si produksioni ka reaguar ndaj incidentit.
Në padi, Banks thekson se kishte pranuar të merrte pjesë në projekt me qëllim që të kontribuonte në një diskutim të hapur dhe të sinqertë mbi kritikat ndaj emisionit. Megjithatë, ajo pretendon se nga një intervistë që zgjati rreth 3 orë e 30 minuta, në versionin final të dokumentarit janë përdorur vetëm 16 minuta.
Deri tani, Netflix nuk ka bërë një koment publik lidhur me padinë. Çështja pritet të zhvillohet në gjykatë, ndërsa mund të hapë debat të ri mbi mënyrën se si dokumentarët trajtojnë dhe montojnë deklaratat e personazheve publike.
Burimi;https://www.instagram.com/tyrabanks
Foto; https://www.instagram.com/tyrabanks