Reperi amerikan Kanye West (Ye) ka mbërritur në Tiranë, ku mbrëmjen e sotme pritet të ngjitet në skenë për një nga koncertet më të mëdha të organizuara ndonjëherë në Shqipëri. Pamjet e mbërritjes së artistit janë publikuar nga media vendase, ku ai shihet duke hyrë në ambientet ku po zhvillohen përgatitjet e fundit për eventin.
Koncerti do të mbahet në një stadium të përkohshëm të ndërtuar në zonën e Kasharit, me kapacitet të pritshëm prej rreth 60 mijë spektatorësh. Organizatorët kanë premtuar një produksion të standardeve ndërkombëtare, me skenografi moderne, efekte vizuale dhe teknologji të avancuar.
Për shkak të fluksit të madh të pjesëmarrësve, autoritetet kanë marrë masa të posaçme sigurie dhe kanë njoftuar kufizime të përkohshme të qarkullimit në zonat përreth vendit ku zhvillohet koncerti.
Kryeministri Edi Rama ka deklaruar se organizimi është gati, duke e cilësuar koncertin si një mundësi për ta promovuar Shqipërinë në arenën ndërkombëtare dhe për të tërhequr mijëra vizitorë të huaj.
Megjithatë, eventi është shoqëruar edhe me polemika. Vendimi i qeverisë për të mbështetur financiarisht organizimin e koncertit ka nxitur reagime nga opozita dhe grupe të shoqërisë civile, të cilat kanë kritikuar përdorimin e fondeve publike dhe zgjedhjen e artistit, duke pasur parasysh deklaratat e tij të diskutueshme në vitet e fundit.