Thashethemet se Cristiano Ronaldo dhe Georgina Rodriguez do të kurorëzonin dashurinë e tyre me martesë këtë fundjavë kanë pushtuar rrjetet sociale, por duket se lajmi nuk qëndron.
Sipas raportimeve të revistës “¡HOLA!”, çifti i njohur nuk do të zhvillojë një ceremoni martesore këtë fundjavë, pavarësisht spekulimeve të shumta që qarkulluan në internet.
Zërat nisën pasi një televizion portugez publikoi një ftesë të pretenduar dasme, ku thuhej se Ronaldo dhe Georgina do të martoheshin më 1 gusht në Quinta da Regaleira, një pronë historike në Sintra të Portugalisë. Madje, në raportime përmendej edhe një kod i veçantë veshjeje, sipas të cilit të ftuarit duhej të paraqiteshin të veshur me të zeza.
Megjithatë, burime pranë çiftit të cituara nga “¡HOLA!” kanë mohuar se dasma do të mbahet në këtë datë. Edhe aktivitetet e planifikuara në Quinta da Regaleira duket se nuk lidhen me një event privat, pasi vendi vazhdon të jetë i hapur për vizitorët.
Cristiano Ronaldo dhe Georgina Rodriguez janë në një lidhje prej gati një dekade dhe kanë krijuar një familje të madhe së bashku. Me kalimin e viteve, ata janë kthyer në një nga çiftet më të komentuar të botës së sportit dhe showbiz-it.
Georgina ka folur më herët për dëshirën e saj që një ceremoni e mundshme martese të jetë intime, larg vëmendjes së tepërt publike. Ajo ka ndarë gjithashtu edhe emocionet për unazën e fejesës që i është dhuruar nga Ronaldo, duke e cilësuar si një bizhuteri shumë të veçantë.
Aktualisht, çifti po kalon kohë me familjen dhe miqtë, duke shijuar ditë të qeta pushimesh me plazh, not, golf, vakte familjare dhe stërvitje.
Deri tani, Cristiano Ronaldo dhe Georgina Rodriguez nuk kanë bërë një njoftim zyrtar për datën e martesës. Angazhimet e futbollistit me Al Nassr dhe kalendari i tij i ngarkuar sportiv mund ta bëjnë më të vështirë organizimin e një ceremonie në afat të shkurtër.