A mund ta dëmtojë drita blu e ekraneve dixhitale lëkurën tuaj?

Me shumë mundësi keni dëgjuar se si drita blu mund të dëmtojë sytë dhe cilësinë e gjumit tuaj. Madje mund të keni blerë edhe një palë syze me dritë blu. Kohët e fundit, produktet e kujdesit për lëkurën kanë dalë në treg, duke pretenduar se mbrojnë lëkurën tonë nga efektet e dëmshme të dritës blu. Por a janë ato të nevojshme?

Burimi kryesor i dritës blu është rrezet e diellit, por ekranet dixhitale, duke përfshirë telefonat celularë, kompjuterët, laptopët dhe televizorët, janë të gjitha burime shtesë të dritës blu, sipas dermatologut të çertifikuar Thomas Griffin, Jr. MD.

Hulumtimi mbi këtë temë është i kufizuar, por ekspertët bien dakord se energjia më e ulët dhe gjatësia e valës më e gjatë në dritën blu mund të depërtojnë më thellë në lëkurë sesa rrezatimi ultravjollcë (UV), i cili mund të shkaktojë kancer të lëkurës.

“Tradicionalisht, ne i kemi konsideruar gjatësitë më të shkurtra të valëve të dritës UVA dhe UVB si të dëmshme dhe kancerogjene për lëkurën”, tha Griffin për Verywell. “Megjithatë, duke pasur parasysh rritjen e kohës para ekranit në botën moderne, ndryshimet e lëkurës për shkak të dritës blu janë nxjerrë në dritë.”

Ai shtoi se një nga ndikimet më të zakonshme të ekspozimit ndaj dritës blu në lëkurë është hiperpigmentimi, i cili bën që lëkura të jetë më e errët ose me ngjyrë të ndryshme. Gjithashtu është treguar se shkakton plakje të parakohshme, prishje të kolagjenit dhe mosfunksionim të barrierës së lëkurës.

Por Sa e dëmshme është drita blu artificiale?
Ndërsa drita blu nga dielli mund të ndikojë negativisht në lëkurën tonë, nuk ka konsensus nëse ekranet dixhitale lëshojnë dritë blu të mjaftueshme për të qenë të dëmshme.

Një studim i vitit 2018 zbuloi se “ekspozimi ndaj dritës së emetuar nga pajisjet elektronike në qelizat e lëkurës njerëzore, edhe në rast të ekspozimeve të shkurtra, mund të rrisë gjenerimin e specieve reaktive të oksigjenit”, gjë që çon në plakje.

Por një studim tjetër nga viti 2021 zbuloi se “sasia e dritës blu artificiale të emetuar gjatë përdorimit konvencional të pajisjeve elektronike nuk është aspak e mjaftueshme për të shkaktuar efekte të dëmshme në lëkurë”. Sipas këtij studimi, kalimi i një jave të tërë, pa ndërprerje, para një monitori në një distancë prej 30 cm nga ekrani do të ishte i njëjtë – për sa i përket efekteve të dritës blu – me vetëm një minutë jashtë në një ditë me diell vere.

Duke cituar studimin e vitit 2021, Beth Goldstein, MD, FAAD, një dermatologe dhe kirurge Mohs.

“Rezulton se drita blu nga ekranet nuk është aq shqetësuese sa mendonim dikur”, tha ajo, “por drita e dukshme që përmban dritë blu në mjedis vazhdon të jetë shqetësuese”.

Drita Blu Ka Edhe Përfitimet e Saja
Kur diskutohen efektet e dritës blu, theksi tenton të jetë në dëmet e saj të mundshme, por drita blu ndonjëherë përdoret edhe si trajtim për shumë probleme të lëkurës.

Në dermatologji, sipas Goldstein, drita blu – kur përdoret në cilësime më të ulëta energjie – mund të përdoret për të trajtuar njollat prekanceroze të lëkurës dhe psoriazën. Por duhet të përdoret së bashku me ilaçe të tjera.

“Ne gjithashtu e dimë se e njëjta dritë vetëm pa ndonjë ilaç shtesë mund të shkaktojë skuqje, rritje të pigmentimit të parregullt, veçanërisht në llojet e lëkurës më të errët, të shkaktojë stres oksidativ, disa fotoplakje dhe mund të përkeqësojë sëmundje të caktuara të lëkurës që janë të ndjeshme ndaj dritës, duke përfshirë reagimet ndaj ilaçeve të caktuara”, tha Goldstein.

Si ta Mbroni Lëkurën Tuaj
Ndërsa duhen bërë më shumë kërkime mbi dritën blu të emetuar nga ekranet dixhitale, ekspertët thonë se duhet ta mbrojmë lëkurën tonë nga drita blu që vjen nga ekspozimi në diell.

Sipas Griffin, kremrat tradicionalë kimikë të diellit shpesh nuk ofrojnë mbrojtje nga drita blu. Kremat fizikë të diellit, nga ana tjetër, konkretisht ato që përmbajnë oksid zinku, ofrojnë mbrojtje kundër dritës blu, si dhe mbrojtje të shtuar kundër dritës UVA dhe UVB krahasuar me kremrat kimikë të diellit.

“Këto kremra kundër diellit duhet të jenë burimi kryesor i mbrojtjes,” tha ai. “Përveç kësaj, oksidet e hekurit, antioksidantët dhe hidratuesit mund të ndihmojnë.”

Oksidet e hekurit ndihmojnë në bllokimin e dritës blu në një mënyrë të ngjashme me kremin kundër diellit, shpjegoi Griffin, ndërsa antioksidantët që gjenden në disa serume topike cilësore ndihmojnë në parandalimin e radikaleve të lira. Ndërkohë, hidratuesit ndihmojnë në hidratimin e lëkurës dhe në rindërtimin e barrierës së lëkurës e cila mund të dëmtohet nga drita blu.

Dhe nëse jeni të shqetësuar për potencialin e ndikimeve negative nga pajisjet tuaja, Griffin sugjeroi blerjen e mburojave që bllokojnë dritën blu për t’u vendosur mbi ekranet tuaja, dhe gjithashtu mund të aktivizoni cilësimin e modalitetit të natës në pajisjet tuaja për të zvogëluar emetimin e dritës blu.

Burimi i artikullit: https://www.verywellhealth.com/can-blue-light-harm-your-skin-6745463

Burimi i fotos: https://www.pexels.com/photo/silver-imac-turned-on-displaying-different-photos-1999463/