Astrologjia vijon të mbetet një nga temat më të diskutuara dhe më të kërkuara në internet, pavarësisht se shumë njerëz deklarojnë se nuk besojnë plotësisht tek horoskopi. Kur bëhet fjalë për marrëdhëniet personale, karakterin apo pajtueshmërinë mes partnerëve, miliona përdorues në mbarë botën drejtohen çdo ditë te Google për të mësuar më shumë rreth shenjave të zodiakut.
Sipas një analize të publikuar nga media e huaj “New York Post”, kompania amerikane e marketingut “AMP Agency” analizoi rreth 19 milionë kërkime të realizuara në Google, duke zbuluar se cilat janë shenjat që zgjojnë më shumë interes tek publiku.
Në krye të listës renditet Luani. E njohur si një nga shenjat më karizmatike dhe më të sigurta në vetvete, Luani tërheq vëmendjen për natyrën dominuese, energjinë pozitive dhe dëshirën për të qenë gjithmonë në qendër të vëmendjes. Shumica e kërkimeve lidhen me pajtueshmërinë e kësaj shenje në dashuri dhe miqësi, si edhe me mënyrën se si sillet në marrëdhënie. Interesant është fakti se, sipas të dhënave amerikane, Luani konsiderohet një nga shenjat më të rralla të zodiakut, por njëkohësisht edhe më e kërkuara në internet.
Në vendin e dytë renditet Shigjetari. Persona të lindur nën këtë shenjë njihen për shpirtin aventurier, dëshirën për liri dhe natyrën optimiste. Shigjetari shihet si një nga shenjat më sociale dhe argëtuese të horoskopit, çka shpjegon edhe interesin e madh të përdoruesve për të mësuar më shumë rreth tij. Sipas raportit, kjo shenjë është ndër më të rrallat, por vazhdon të mbetet ndër më të kërkuarat në Google.
Ndërkohë, vendin e tretë e mban Akrepi. I përshkruar shpesh si misterioz, pasionant dhe intuitiv, Akrepi mbetet një nga shenjat që ngjall më shumë kuriozitet tek njerëzit. Kërkimet për këtë shenjë lidhen kryesisht me karakterin e fortë, marrëdhëniet sentimentale dhe mënyrën se si përballet me emocionet. Në ndryshim nga Luani dhe Shigjetari, Akrepi konsiderohet një nga shenjat më të zakonshme të zodiakut në Shtetet e Bashkuara, gjë që mund të ndikojë edhe në numrin e lartë të kërkimeve.
Ekspertët theksojnë se astrologjia vazhdon të ketë ndikim të madh në kulturën popullore dhe rrjetet sociale, ku çdo ditë miliona persona lexojnë parashikime, karakteristika dhe këshilla të lidhura me shenjën e tyre të horoskopit.
Burimi; https://nypost.com/
Foto; Freepik.com