Biznesmeni dhe filantropi amerikan Ted Turner, themeluesi i rrjetit prestigjioz CNN, është ndarë nga jeta në moshën 87-vjeçare. Lajmi është konfirmuar nga Turner Enterprises, që bëri të ditur se ai u shua i qetë, i rrethuar nga familjarët e tij.
I lindur në Ohio dhe i rritur në Atlanta, Turner konsiderohet një nga figurat më me ndikim në historinë e medias moderne. Ai revolucionarizoi industrinë televizive duke sjellë për herë të parë konceptin e lajmeve 24 orë në ditë me krijimin e CNN më 1 qershor 1980.
Ky projekt ndryshoi përgjithmonë mënyrën se si publiku në mbarë botën konsumon informacionin dhe ndjek zhvillimet globale në kohë reale.
Përveç suksesit në media, Ted Turner u dallua edhe si filantrop dhe aktivist i angazhuar për çështje globale. Ai themeloi United Nations Foundation dhe kontribuoi në iniciativa që lidhen me çarmatimin bërthamor, mbrojtjen e mjedisit dhe ruajtjen e jetës së egër në SHBA, përfshirë rikthimin e bizonëve në natyrë.
Në vitin 1991, revista prestigjioze Time e shpalli “Njeriun e Vitit”, duke vlerësuar ndikimin e tij të jashtëzakonshëm në botën e informacionit dhe komunikimit.
Edhe pse më vonë shiti rrjetet e tij tek Time Warner, Turner e konsideronte CNN si arritjen më të madhe të jetës së tij.
Ted Turner lë pas pesë fëmijë, 14 nipër e mbesa dhe dy stërnipër, ndërsa trashëgimia e tij në industrinë e medias mbetet ndër më të rëndësishmet në histori.
Burimi; https://www.instagram.com/p/CdhU7SCLxVl
Foto; https://www.instagram.com/p/CdhU7SCLxVl