Eurovision Song Contest 2026 nis zyrtarisht këtë javë në Vjenë të Austrisë, duke shënuar edicionin e 70-të të një prej spektakleve muzikore më të ndjekura në botë. Eventi do të zhvillohet në arenën ikonike “Wiener Stadthalle”, ndërsa gjysmëfinalet janë planifikuar më 12 dhe 14 maj, me finalen e madhe që do të mbahet më 16 maj.
Në këtë edicion marrin pjesë 35 shtete, të ndara në dy gjysmëfinale, ku vetëm 20 vende do të sigurojnë një biletë për natën finale. Automatikisht në finale kalojnë Austria si vend mikpritës dhe vendet e “Big Five”: Franca, Gjermania, Italia, Spanja dhe Mbretëria e Bashkuar.
Shqipëria këtë vit përfaqësohet nga këngëtari Alis me këngën “Nan”, duke synuar një tjetër sukses në skenën europiane të muzikës. Lista e plotë e pjesëmarrësve është publikuar tashmë nga organizatorët e Eurovisionit.
Sipas parashikimeve të para, Finlanda konsiderohet favoritja kryesore për të fituar Eurovision 2026 me duetin Linda Lampenius dhe Pete Parkkonen dhe këngën “Liekinheitin”. Ndër favoritët përmenden gjithashtu Greqia, Danimarka, Franca dhe Australia.
Megjithatë, edhe këtë vit Eurovisioni është shoqëruar me polemika. Pjesëmarrja e Izraelit ka nxitur reagime dhe thirrje për bojkot nga disa vende dhe aktivistë, duke sjellë tension politik në një event tradicionalisht të fokusuar tek muzika dhe argëtimi.
Për shkak të shqetësimeve të sigurisë, autoritetet austriake kanë shtuar masat mbrojtëse në të gjithë Vjenën, me kontrolle të shtuara, ndalim dronësh dhe prani të lartë policore pranë arenës dhe zonave të tifozëve.
Burimi;https://www.eurovision.com/eurovision-song-contest/vienna-2026
Foto;Freepik.com